ثلاثياث ليبية

فيه ثلاثيات هلبة فى العالم يتكلموا عليهم، لكن هادى ثلاثيات فى ليبيا بس..تفضلوا :
- ثلاثة تسبب الإحباط : الواسطة..و الديون ... والمنتخب الليبي .
- ثلاثة صعب نتخلى عنها : الماء..والهواء..والبازين .
- ثلاثة محتاجات واسطة : البعثات..والشقق...وأى مصلحة إدارية تبي تقضيها.
- ثلاثة يرفعوا الضغط : الملح..وزحمة المرور..والعيل كان عشش .
- ثلاثة تسبب الغرور : الفيلا. . والهامر..وبدلة الحرس البلدي .
- ثلاثة ياكلوا في لحوم البشر: الحيوانات المفترسة..والبزناسة الكبار..وجماعة القرمة كان شبعوا .
- ثلاثة لازم نتخلى عنهم : التفنيص.. والتلقيح..واللُّـقني وقت العمل .
- ثلاثة ما يرقدوش الليل : المديون..والخانب..وواحد نايضة عليه السوسة .
- ثلاثة شبه اختفوا من ليبيا : الدلاع الطويل..واحترام الشيابين..والفراشية .
- ثلاثة ما تحسش بطعمتهم الا في ليبيا : امبكبة على الحطب..والبورديم..وشاهي العالة.
- ثلاثة تدعو لهم بالهداية : البلعوط ..والمحسدي.. والخنايسي..يكفيكم شرهم
- ثلاثة ما تستغربش منهم في ليبيا : واحد قاص الطريق السريع على رجليه..وواحد يسوق في الاتجاه العكسي..وواحد طالع في الاحمر .
- ثلاثة كان مشوا تتمنى ما عادش يولوا : الفقر ..والمرض.. والبنت كان تزوجت .
- ثلاثة تتمنى ما تتصبحش فيهم : سواق افيكو مستعجل..وطابور طويل في الشيل..والمدير المتعارك مع مرته.
- ثلاثة ربي يفكك منهم : مجاري مفتوحة..كلب مطلوق..ورشادة طايشة .
- ثلاثة ما ليهمش معنى إلا في ليبيا : العسلوز..والزميطة . . والعصبان .
- ثلاثة لا تستخدم إلا في ليبيا : الحمّاس..والكانون..والمغرف.

ريم الجبل